Aurten, OMEk «Elkarrekin osasunaren alde» lelopean deitzen gaitu Osasunaren Mundu Egunean (apirilaren 7an). Osasunaren erronka nagusiak lankidetzatik eta konpromiso kolektibotik konpontzen direla gogorarazteko gonbita.
Ortzadarren oso identifikatuta sentitzen gara mezu horrekin, horixe egiten dugulako egunero hala eskatzen diguten udalerriekin batera: osasuna tokian tokitik eraikitzea, modu koordinatuan eta konprometituan.
Ildo horretan, Adikzioak Prebenitzeko eta Osasuna Sustatzeko tokiko Planak dira borondate hori benetako ekintza bihurtzen duen tresna. Udalerri batek bere jendearekin duen konpromisoa da, prebentzioa, batez ere, osasuna sustatzea delako.
Prebentzio-plan on batek hainbat frontetan lan egiten du aldi berean: ikasgeletan, auzoetan, familiekin, kolektibo ahulenekin. Helburua ez da soilik kontsumoak edo mendekotasuna sortzen duten beste portaera batzuk saihestea, baizik eta trebetasunak indartzea eta haztea eta bizitzea errazagoa den inguruneak sortzea. Eta koordinaziotik egiten du, udalak, ikastetxeak, gizarte-zerbitzuak, osasun-baliabideak, herritarrak… norabide berean doazenean.
Ortzadarren urteak daramatzagu udalerriekin batera plan horiek diseinatzen, garatzen eta ebaluatzen. Eta denbora honetan guztian ikasi duguna da ez daudela bi udalerri berdin. Horregatik, prozesu bakoitza hasten da entzuten: profesionalak, familiak, gazteak, elkarteak. Lurraldearen benetako ezagutzatik abiatuta bakarrik diseina daitekeelako benetan funtzionatuko duen plan bat.
Duela gutxi lankidetzan aritu garen planen artean daude, besteak beste, Basauriko 2024 – 2028 aldirako Osasuna Sustatzeko eta Adikzioak Prebenitzeko Tokiko Plana, Muskizko 2025 – 2033 aldirako Adikzioak Prebenitzeko eta Osasuna Sustatzeko III. Tokiko Plana, Txorierriko Mankomunitateko 2025 – 2030 aldirako Esku-hartze Komunitarioko eta Osasunaren Sustapeneko Plana eta Mungialdeko Mankomunitateko 2022 – 2026 aldirako VI. Mendekotasun Plana. Eta jarraitzen dugu: une honetan Orion eta Arratiako Mankomunitatean martxan dauden prozesu berriak laguntzen ari gara.
