Joan den urriaren 15ean Landa Eremuko Emakumeen Nazioarteko Eguna ospatu genuen, kalitatezko elikagaien ekoizpenean, gure herrien garapenean eta ingurune naturalaren kontserbazioan duen funtsezko papera aitortu eta ikusarazteko data.
Testuinguru horretan, HAZI Fundazioak bultzatutako eta Ortzadarrek teknikoki garatutako Kalitatea Topera programak errealitate hori belaunaldi berriei hurbiltzen laguntzen du, Euskadiko nekazaritza- eta abeltzaintza-ustiategietara eta elikagaiak eraldatzeko zentroetara bisita didaktikoak eginez.
Esperientzia horiek aukera ematen diete ikasleei baserritarren lana bertatik bertara ezagutzeko, emakumeek sektorean duten zeregina ikusarazteko eta landa-inguruneak eskaintzen dituen aukera profesionalak ezagutzeko, tradizioak, berrikuntzak eta iraunkortasunak bat egiten baitute etorkizuneko erronkei aurre egiteko.
Ortzadarretik uste dugu lehen sektorea belaunaldi berriei hurbiltzea, erreferente femeninoak ikusaraztea eta aukera-berdintasuna sustatzea beharrezko urratsak direla bokazio berriak pizteko eta belaunaldien arteko erreleboa bultzatzeko.
Izan ere, gure landa-ingurunearen etorkizuna hezkuntzatik, aitorpenetik eta berdintasunetik eraikitzen da.

Errealitate hori ikasleengana hurbiltzea gustatuko litzaizuke?
Kalitatea Topera! ekimenak aukera ematen die ikastetxeei ikasgelatik ateratzeko eta bertatik bertara ezagutzeko nola ekoizten eta eraldatzen diren Euskadiko elikagaiak, nortzuk dauden horien atzean eta lehen sektoreak gure gizartean duen zeregina.
Bigarren Hezkuntzako, Batxilergoko edo Lanbide Heziketako irakaslea bazara, anima zaitez zure ikasleekin Kalitatea Toperan parte hartzera!
Bisiten eta nola parte hartu jakiteko, idatzi kalitateatopera@ortzadar.es helbidera edo kontsultatu HAZIren webgunea.